Mercedes 280 SE

Təsvir

Klassik avtomobil həvəskarları üçün xüsusi maraq doğuran W126 kuzovlu, avtomobil həvəskarları arasında daha çox “Diplomat” kimi tanınan Mercedes-Benz S-Class. Mənim fikrimcə, bu kuzov Mercedes-Benz S-Class tarixində istehsal olunmuş ən gözəl kuzovlardan biridir. Görünüşü, yığılma keyfiyyəti, komfortu və avtomobil tarixində tutduğu yer baxımından həqiqətən də mükəmməl klassikadır. Avtomobil 1983-cü il istehsalıdır və artıq 43 yaşına çatdığı üçün retro və klassik avtomobil tədbirlərində, sərgilərdə və yürüşlərdə iştirak edə bilir. Məndə olduğu müddətdə Azərbaycan Avtomobil Federasiyasının təşkil etdiyi bir neçə tədbirdə nümayiş olunub və hər zaman böyük maraqla qarşılanıb. Avtomobil 1993-cü ildə Almaniyadan bir həvəskar tərəfindən Azərbaycana gətirilib. Həmin vaxt yürüşü təxminən 200,000 kilometrə yaxın olub. O vaxtdan etibarən avtomobilə çox yaxşı qulluq edilib. Məndə olduğu müddətdə də bütün texniki xidmətlər vaxtında və keyfiyyətli ehtiyat hissələri, yağlar və digər mayelərlə həyata keçirilib. Avtomobil tam hərəkətdədir və rahat şəkildə istifadə olunur. Hətta yaxın zamanda iki ay ərzində gündəlik avtomobil kimi istifadə olunub və heç bir problem yaratmayıb. Təbii ki, yaşı nəzərə alınanda bəzi xırda işləri mövcuddur. Yanacaq səviyyəsi göstəricisi işləmir və dəyişdirilməlidir. Sürətlər qutusunun selektorunun altındakı dəri örtükdə kiçik tikiş işi görülməlidir. Yeni sahibi istəsə, diskləri yenidən rənglədə bilər. Avtomobil keçmiş sahibinin dövründə rənglənib. Avtomobildə orijinal Becker maqnitofonu qorunub saxlanılıb. Zavod görünüşünü pozmamaqla yanaşı, daha keyfiyyətli səs əldə etmək üçün maqnitofonun daxilində müəyyən yeniləmələr edilib və Bluetooth modulu quraşdırılıb. Bu sayədə telefondan birbaşa Bluetooth vasitəsilə musiqi dinləmək mümkündür. Bundan əlavə, zavod dinamiklərinin yerinə yeni Pioneer dinamikləri quraşdırılıb və bütün dəyişikliklər orijinal dinamik örtüklərinin altında aparıldığı üçün interyerin zavod görünüşü tam qorunub saxlanılıb. Ön sərnişin oturacağının altında kompakt Kenwood subwoofer quraşdırılıb. Heç bir əlavə detal gözə görünmür, lakin səs keyfiyyəti nəzərəçarpacaq dərəcədə yaxşılaşıb. Bu yaxınlarda avtomobilə yeni kondisioner sistemi quraşdırılıb. 1993-cü ilə qədər Almaniyada keçdiyi bütün servis tarixçəsi avtomobilin üzərindədir. 1993-cü ildən bu günə qədər isə Azərbaycanda 100 min kilometrdən az istifadə olunub. Özünə yaxşı baxılmış, etibarlı, rahat şəkildə sürülə bilən və gələcəkdə də dəyərini qoruyacaq klassik avtomobil axtaranlar üçün çox yaxşı seçimdir.